Vërshimet në Prishtinë: Përparim Rama viziton familjet e evakuuara në Kodrën e Trimave

Kryetari i Komunës së Prishtinës, Përparim Rama, ka vizituar sot familjet e evakuuara në lagjen Kodra e Trimave, pas reshjeve të dendura të shiut që shkaktuan vërshime serioze në disa pjesë të kryeqytetit.

Situata e krijuar nga moti i lig ka detyruar disa familje të braktisin shtëpitë e tyre për shkaqe sigurie. Gjatë vizitës në rrugën "Aziz Zhilivoda", Rama u njoftua nga afër me dëmet e shkaktuara dhe gjendjen e banorëve të prekur nga kjo fatkeqësi natyrore.

Nga Komuna e Prishtinës kanë bërë të ditur se qëllimi i kësaj vizite është ofrimi i mbështetjes direkte të institucionit komunal për qytetarët. Autoritetet lokale janë mobilizuar për të menaxhuar pasojat e vërshimeve dhe për të siguruar që familjet e evakuuara të kenë strehim dhe kushtet e nevojshme gjatë kësaj periudhe emergjente.

Reshjet e fundit kanë nxjerrë në pah sërish sfidat e infrastrukturës në disa lagje të Prishtinës, ndërsa ekipet e emergjencës mbeten në terren për të monitoruar situatën dhe për të ndërhyrë aty ku është e nevojshme.