Pas vërshimeve, Prishtina në fazën e rimëkëmbjes: Ftohen qytetarët për dëmshpërblim

Prishtina nis fazën e rimëkëmbjes pas vërshimeve

Prishtina ka hyrë zyrtarisht në fazën e rimëkëmbjes pas vërshimeve të fundit që prekën shumë pjesë të vendit, duke përfshirë edhe kryeqytetin. Drejtori i Emergjencave në Komunën e Prishtinës, Lulzim Fushtica, ka bërë të ditur se ekipet janë në terren duke punuar intensivisht për të kthyer jetën në normalitet.

“Pas vërshimeve dhe dëmeve të shkaktuara në ekonomitë familjare, biznese dhe bujqësi, për momentin jemi në fazën e rimëkëmbjes. Kemi ekipet në disa lagje të cilat me makineri të rënda po merren me pastrimin, largimin e baltës dhe mbeturinave,” deklaroi Fushtica për Ekonomia Online.

Intervenimet në kryeqytet dhe fshatra

Sipas autoriteteve, vetëm gjatë ditës së shtunë janë realizuar mbi 30 intervenime. Fushtica theksoi se zonat më të prekura ishin fshatrat si Bërnica e Poshtme dhe e Epërme, Prugovci, Drenoci, Mramori e Slivova, por edhe lagje urbane si "Kodra e Trimave", "Emshir", "Dragodan" e "Kalabria".

Për momentin, fokus i veçantë është te fshati Drenoc, konkretisht te zona e varrezave, për të larguar ujin dhe mbeturinat e lëna pas nga vërshimet.

Vlerësimi i dëmeve dhe kërkesat për dëmshpërblim

Lidhur me dëmet materiale, ato vërehen kryesisht në katet përdhese të shtëpive, pajisje shtëpiake dhe shtëpi me konstruksion më të vjetër. Fushtica u bëri thirrje qytetarëve që të fillojnë dorëzimin e kërkesave për dëmshpërblim.

“Sot do të bëjmë thirrje që qytetarët të fillojnë të dorëzojnë kërkesat për dëmshpërblim pranë Komisionit për vlerësimin e dëmeve. Komisioni do t’i vizitojë të gjithë dhe do të bëjë raportin që dorëzohet në Qeveri për dëmshpërblim.”

Vlen të theksohet se sipas një vendimi të vitit 2022, kompetenca për dëmshpërblim i takon nivelit ekzekutiv (Qeverisë), ndërsa komuna kryen procedurat e vlerësimit dhe hartimit të raporteve në terren.