Policia e Pejës me apel urgjent: Kujdes maksimal nga ngricat në rrugë

Drejtoria Rajonale e Policisë në Pejë i ka bërë thirrje qytetarëve për kujdes të shtuar gjatë ditëve të ftohta, pas rënies së temperaturave që ka shkaktuar krijimin e ngricave në rrugë dhe trotuare.

Sipas autoriteteve policore, këto kushte atmosferike paraqesin rrezik serioz për sigurinë në trafik, duke rritur ndjeshëm mundësinë e aksidenteve rrugore dhe duke rrezikuar lëvizjen e këmbësorëve.

Apel i veçantë për pronarët e autolarjeve

Një thirrje specifike u është drejtuar pronarëve të autolarjeve. Policia kërkon nga ata që të ndalojnë derdhjen e ujit në rrugë dhe hapësira publike gjatë pastrimit të automjeteve. Ky veprim, në temperatura nën zero, kthehet menjëherë në shtresa të rrezikshme akulli.

Policia ka bërë të ditur se në bashkëpunim me inspektorët komunalë, do të ndërmarrin masa kontrolli dhe do të zbatojnë sanksione ligjore ndaj të gjithë atyre që shkelin këto rregulla dhe rrezikojnë sigurinë publike.

“Policia mbetet e përkushtuar në garantimin e sigurisë për të gjithë qytetarët dhe apelon për bashkëpunim.”

Qytetarëve u kërkohet që të shmangin çdo veprim që mund të komprometojë sigurinë në rrugë, ndërsa shoferët porositen të përshtatin shpejtësinë me kushtet e rrugës.