Sheinbaum: E përjashtova ndërhyrjen ushtarake amerikane në bisedën me Trumpin

Presidentja e Meksikës, Claudia Sheinbaum, ka deklaruar se e ka përjashtuar mundësinë e një ndërhyrjeje ushtarake të Shteteve të Bashkuara në vendin e saj për të luftuar kartelet e drogës. Kjo deklaratë erdhi pas një bisede telefonike që ajo zhvilloi të hënën me presidentin amerikan, Donald Trump, të cilën e cilësoi si një “bisedë të mirë”.

Gjatë konferencës së saj të përditshme për media, Sheinbaum theksoi se i ka refuzuar në mënyrë të prerë ofertat për veprime ushtarake të propozuara nga Trump në territorin meksikan. Ajo shtoi se do të kërkonte një tjetër komunikim të drejtpërdrejtë nëse Washingtoni zyrtar do të lëshonte deklarata që bien ndesh me atë që u diskutua në bisedën e tyre.

“Ne vazhdojmë të bashkëpunojmë brenda kornizës së sovranitetit tonë... Ne kërkojmë bashkërendim pa nënshkrim.”

Presidentja meksikane njoftoi gjithashtu përmes rrjetit social X se diskutimi me homologun e saj u fokusua në sigurinë kombëtare, tregtinë, investimet dhe luftimin e trafikimit të narkotikëve, por gjithmonë duke respektuar sovranitetin e Meksikës.

Kërcënimet e Trump dhe qasja amerikane

Javën e kaluar, presidenti Donald Trump kishte sugjeruar në një intervistë televizive se kartelet e drogës në fakt “udhëheqin” Meksikën. Ai la të kuptohej se SHBA mund të ndërmerrte sulme ndaj objektivave tokësore në territorin meksikan për të asgjësuar këto grupe kriminale. Ky qëndrim u reflektua edhe në bisedimet midis Sekretarit të Shtetit, Marco Rubio, dhe ministrit të Jashtëm meksikan, Juan Ramon de la Fuente.

Pavarësisht hijeve të ndërhyrjes ushtarake, Sheinbaum prezantoi të dhëna pozitive sa i përket luftës kundër drogës, duke pohuar se trafikimi i fentanilit drejt SHBA-së ka pësuar një rënie prej rreth 50 për qind gjatë vitit të kaluar. Ajo sqaroi gjithashtu se në bisedën me Trump nuk u prek tema e Kubës apo situata në Venezuelë pas arrestimit të Nicolas Maduros.