Jo veç në Prizren: Prokuroria aktivizohet në të gjitha komunat me rinumërim votash

Sistemi Prokurorial i Kosovës ka bërë të ditur se në të gjitha komunat ku ka përfunduar procesi i rinumërimit të votave do të nisë grumbullimi i informatave për keqpërdorimet në procesin zgjedhor. Ky veprim nuk kufizohet vetëm në Prizren, por shtrihet në të gjithë territorin e Kosovës.

Zyra e Kryeprokurorit të Shtetit ka informuar opinionin se Prokuroria ka monitoruar vazhdimisht nga jashtë procesin e rinumërimit të rezultateve zgjedhore.

“Pas evidentimit të mospërputhjeve të votave gjatë numërimit brenda subjekteve politike për deputet, në rajone të ndryshme, ka kërkuar nga kryeprokurorët e të gjitha prokurorive themelore që të fillojnë grumbullimin e informatave dhe provave relevante.”

Kjo kërkesë zbatohet në të gjitha komunat ku rinumërimi ka përfunduar dhe menjëherë pas përfundimit në ato ku ende nuk ka mbaruar. Synimi është vërtetimi i çdo vepre penale të lidhur me zgjedhjet.

Prokuroria e Shtetit rithekson angazhimin për mbrojtjen e votës së lirë dhe hetimin e çdo rasti dyshimtar të falsifikimit, pavarësisht nga mënyra apo personat e përfshirë.

Konteksti i zhvillimeve

Ky reagim vjen pas evidentimit të parregullësive në rinumërimin e pjesshëm të votave në 914 vendvotime, duke ngritur shqetësime për integritetin zgjedhor në disa komuna si Prizreni.