Shaqir Totaj reagon për manipulimet zgjedhore në Prizren: Kërkon llogaridhënie të plotë
Kryetari i Komunës së Prizrenit, Shaqir Totaj, ka reaguar për herë të parë ndaj parregullësive të evidentuara gjatë rinumërimit të votave në Prizren, duke shprehur zhgënjim të thellë dhe premtuar kërkesë për përgjegjësi individuale.
Kryetari i Komunës së Prizrenit dhe udhëheqësi i degës së Partisë Demokratike të Kosovës (PDK) në këtë qytet, Shaqir Totaj, ka dalë për herë të parë me një reagim publik lidhur me parregullsitë e zbuluara gjatë procesit të rinumërimit të votave në Prizren.
Totaj shprehet i zhgënjyer thellësisht me evidentimin e manipulimeve, duke i cilësuar ato si cenim të drejtpërdrejtë të vullnetit të qytetarëve dhe demokracisë.
“Jam jashtëzakonisht i zhgënjyer me parregullsitë e evidentuara nga procesi i rinumërimit të votave në Prizren. Çdo tentim për tjetërësim të votës është cenim i drejtpërdrejtë i vullnetit të lirë të qytetarëve, i demokracisë zgjedhore dhe i vetë demokracisë së brendshme partiake.”
Si kryetar i degës së PDK-së në Prizren, Totaj premton se do të kërkojë përgjegjësi dhe llogaridhënie të plotë për çdo shkelje, duke theksuar se këto veprime nuk përfaqësojnë vlerat e partisë.
Ai siguron qytetarët se PDK-ja do ta mbrojë vullnetin e votuesit dhe demokracinë, duke vepruar me vendosmëri. Gjithashtu, bën thirrje për një rivlerësim të procesit nga KQZ-ja dhe institucionet përkatëse, pasi parregullsitë janë shfaqur në të gjitha partitë.
Reagimi i Totajt vjen në një moment kur procesi i rinumërimit ka nxjerrë në pah probleme në disa komuna, duke ngritur pyetje për integritetin e zgjedhjeve lokale në Kosovë.