Goditje rekord në det: Policia spanjolle sekuestron 10 tonë kokainë të fshehur në kripë

Operacioni "Batica e Bardhë": Oficerët gjejnë drogën nën tonelata kripë

Policia spanjolle ka realizuar një nga goditjet më të forta ndaj trafikut ndërkombëtar të drogës, duke sekuestruar sasinë më të madhe të kokainës në historinë e saj në det. Gati 10 tonë kokainë u gjetën të fshehura brenda një anijeje tregtare në afërsi të Ishujve Kanarine.

Drogë ishte fshehur me mjeshtëri nën një ngarkesë të madhe kripë. Hetuesit dhe prokurorët spanjollë, të cilët po vëzhgonin një grup kriminal ndërkombëtar të dyshuar për eksportimin e sasive gjigante të rrugëve narkotike nga Amerika e Jugut drejt Evropës, kishin identifikuar anijen e dyshimtë që ishte nisur nga Brazili.

Gjatë javës së kaluar, njësitë elitare ndërhynë në anijen që ndodhej rreth 535 kilometra larg brigjeve të Ishujve Kanarine. Oficerët u detyruan të përdornin lopata për të gërmuar nëpër kripë, ku gjetën të paktën 300 pako të mëdha me kokainë.

Bashkëpunimi ndërkombëtar dhe 13 të arrestuar

Ky operacion, i koduar "Batica e Bardhë", nuk ishte vetëm spanjoll. Ai u realizua falë një bashkëpunimi të gjerë midis policisë federale braziliane, administratës amerikane DEA, Agjencisë Kombëtare të Krimit të Britanisë (NCA), si dhe autoriteteve franceze e portugeze.

Si rezultat i aksionit, 13 persona janë vënë në pranga. Anija, e cila kishte mbetur edhe pa karburant gjatë rrugëtimit, u tërhoq deri në portin e Santa Cruz de Tenerife për t'iu nënshtruar kontrolleve të hollësishme.