Sulmi terrorist në Banjskë: Sot fillon gjyqi ndaj tre të akuzuarve serbë

Sot në orën 09:30, në Gjykatën Themelore të Mitrovicës, mbahet seanca gjyqësore e parë ndaj tre të akuzuarve për sulmin e armatosur të 24 shtatorit 2023 në Banjskë të Zveçanit: Blagoje Spasojeviq, Vladimir Toliq dhe Dushan Maksimoviq.

Këta të dyshuar janë të arrestuar dhe nën masë paraburgimi për rolin e tyre në ngjarjen ku humbi jetën polici Afrim Bunjaku dhe u plagosën katër kolegë të tij.

Aktakuza kundër Milan Radoiçiqit dhe 44 të tjerëve

Më 11 shtator 2024, Prokuroria Speciale e Kosovës ngriti aktakuzë ndaj Milan Radoiçiqit dhe 44 personave të tjerë, duke i ngarkuar me vepra penale si terrorizëm, krime të rënda kundër rendit kushtetues dhe sigurisë së Republikës së Kosovës.

“Milan Radoiçiq akuzohet si udhëheqës i grupit terrorist që tentoi të ndajë veriun e Kosovës dhe ta bashkonte me Serbinë.”

Sipas aktakuzës, më 24 shtator 2023, pas bllokimit të rrugës me dy kamionë, grupi sulmoi policët e Kosovës që shkuan për të liruar rrugën. Sulmi zgjati deri në orën 15:00, kur shumica iku drejt Serbisë përmes rrugëve malore.

Grupi besohet se ishte trajnuar profesionalisht dhe kishte hyrë në Kosovë me dhjetëra automjete, armë të rënda, municione, raketahedhës dhe pajisje ushtarake.

Vdekja e policit Afrim Bunjaku dhe plagosjet

Në sulm mbeti i vrarë polici Afrim Bunjaku, ndërsa u plagosën Alban Rashiti, Çlirim Shaqiri, Mirsad Kryeziu dhe Sedat Dushi.

“Ata ishin trajnuar profesionalisht dhe kishin hyrë në Kosovë në mënyrë të paligjshme nga Serbia.”

Radoiçiq akuzohet gjithashtu për lehtësimin dhe financimin e terrorizmit si dhe pastrimin e parave.

Seanca e sotme shënon një hap të rëndësishëm në procesin gjyqësor për këtë ngjarje të rëndë, që ka tronditur sigurinë në Kosovë.

/Digjital.com/