Ushtarët gjermanë largohen nga Groenlanda disa orë pasi Trump kërcënoi me tarifa doganore

Ushtarët gjermanë që kishin mbërritur në Groenlandë për një mision të planifikuar kanë larguar ishullin arktik vetëm 44 orë më vonë, sipas raportimit të gazetës gjermane Bild. Ky zhvillim vjen në një kohë kur tensionet mes SHBA-së dhe aleatëve evropianë për kontrollin e Groenlandës po ashpërsohen.

Autoritetet në Berlin kishin deklaruar një ditë më parë se 15 ushtarët do të qëndronin më gjatë se plani fillestar. Megjithatë, të dielën në mëngjes erdhi urdhri i papritur: “Kthehuni”. Ushtarët u nisën pa shpjegime, ndërsa të gjitha takimet e planifikuara u anuluan menjëherë.

Bild ka publikuar foto nga aeroporti, duke ilustruar largimin e shpejtë. Vendimi duket i lidhur potencialisht me kërcënimet e fundit të Presidentit amerikan Donald Trump për vendosjen e tarifave doganore ndaj tetë vendeve evropiane, përfshirë Gjermaninë, që kanë dërguar trupa në Groenlandë.

“Vendimi për largimin u mor të dielën në mëngjes, pa iu dhënë ndonjë shpjegim ushtarëve.”

Tensionet rreth Groenlandës kanë eskaluar që nga koha kur Trump shprehu interes për blerjen e ishullit strategjik nga Danimarka. Groenlanda, me burimet e saj të pasura minerale dhe pozicionin gjeostrategjik në Arktik, është bërë pikë e nxehtë mes superfuqive si SHBA, Kina dhe Rusia.

Për momentin, nuk dihet nëse largimi ka motive të tjera operative apo është drejtpërdrejt rezultat i presionit ekonomik nga SHBA-ja. Ky incident mund të ndikojë në bashkëpunimin ushtarak evropian në rajon.