Osmani: Nuk mendoj kthimin në listën e VV-së, mandati im i dytë është interes i Kosovës
Presidentja Vjosa Osmani flet për mundësinë e mandatit të dytë, raportet me Albin Kurtin dhe qëndrimin e saj ndaj Asociacionit. Ajo thotë se nuk po e mendon kthimin në listën zgjedhore të VV-së për momentin.
Vjosa Osmani për mandatin e dytë: Është në interes të Kosovës që të jem Presidente
Presidentja e Kosovës, Vjosa Osmani, në një intervistë të fundit ka diskutuar mundësinë e rizgjedhjes së saj në krye të shtetit, raportet me kryeministrin Albin Kurti dhe qëndrimin e saj të palëkundur ndaj Asociacionit të komunave me shumicë serbe.
Osmani ka theksuar se konsideron që vazhdimi i mandatit të saj është në interes të drejtpërdrejtë të Republikës së Kosovës. Sipas saj, kjo nuk ndërlidhet me ambicie personale, por me nevojën për të çuar përpara punët e mira që janë nisur gjatë këtij mandati.
“Në qoftë se nuk zgjidhem Presidente, do gjej mënyra për të kontribuar për vendin tim, për popullin tim. Është në interes të Republikës së Kosovës që të jem unë presidente.”
A do të kthehet në listën e VV-së?
E pyetur për skenarin nëse do të garonte me listën e Lëvizjes Vetëvendosje në rast se nuk siguron mandatin e dytë si presidente, Osmani u tregua e matur. Ajo tha se ky nuk është një opsion që po e shqyrton aktualisht, pasi beson se deputetët do të vlerësojnë punën e saj përtej deklaratave publike.
“Nuk është skenar që e mendoj për momentin, sepse jam e bindur se të gjithë deputetët do ta vendosin interesin e RKS, pavarësisht çka thonë në kamera. Edhe nga VV edhe nga partitë e tjera, vazhdimisht ka pasur vlerësim të lartë për mua,” u shpreh ajo.
Raportet me Kurtin dhe Gërvallën: "Jo njeriu i njëjtë"
Presidentja pranoi se ka pasur mospajtime, veçanërisht lidhur me letrën e dërguar në Këshillin e Evropës, të cilën e cilësoi si të paramenduar jo mirë. Megjithatë, ajo siguroi se raportet institucionale dhe njerëzore me Kryeministrin Albin Kurti mbeten korrekte dhe të shkëlqyera.
“Mospajtimi ka qenë letra. Ne s’jemi njeriu i njëjtë. Ka raste kur nuk jemi pajtuar, por mospajtimet i kemi nxjerrë që të jenë në interes të Kosovës,” deklaroi Osmani.
Asociacioni: "Kurrë kompromis me kompetenca ekzekutive"
Sa i përket dialogut me Serbinë dhe Asociacionit, Presidentja Osmani ishte kategorike. Ajo deklaroi se nuk do të lejojë asnjëherë një organ me kompetenca ekzekutive që do të rrezikonte funksionalitetin e shtetit.
“Kurrë s'kam ofru kompromis për Asociacion me kompetenca ekzekutive. Në qoftë se arrihet te Asociacioni me kompetenca ekzekutive, gjithçka ndalet aty. Kurrë s’e kam ofruar e as s’do ta ofroj,” përfundoi ajo, duke kërkuar garanca ndërkombëtare të ngjashme me ato të vitit 2008 për zbatimin e marrëveshjeve.
