Kurti bën homazhe në 44-vjetorin e vrasjes së Jusuf e Bardhosh Gërvallës dhe Kadri Zekës

Në 44-vjetorin e vrasjes së veprimtarëve të shquar Jusuf e Bardhosh Gërvalla dhe Kadri Zekës nga agjentët e UDB-së, kryeministri në detyrë i Kosovës Albin Kurti, bashkë me presidenten Vjosa Osmani dhe kryetarin e Kuvendit Dimal Basha, kanë bërë homazhe dhe vendosur lule të freskëta te varret e Jusuf e Bardhosh Gërvallës në fshatin Dubovik të Deçanit.

Gjatë homazheve, kryeministri Kurti theksoi se sot po bëjmë nderime për patriotët e jashtëzakonshëm që sakrifikuan gjithçka për lirinë dhe shtetin që kemi sot.

““Edhe para suprimimit të autonomisë, gjatë gjithë kohës kemi pasur patriotë të jashtëzakonshëm, veprimtarë të paepur, të cilët u flijuan duke sakrifikuar gjithçka për shtetin dhe lirinë, të cilën e kemi dhe e gëzojmë sot.””

Ai rikujtoi se shqiptarët nën Jugosllavi nuk kishin paqe, siç dëshmojnë demonstratat dhe të persekutuarit politikë.

““Edhe para luftës, shqiptarët nën Jugosllavi e Serbi nuk kishin paqe dhe për këtë janë dëshmi edhe demonstratat e shumta të organizuara, por gjithashtu edhe ish-të burgosurit e të persekutuarit politikë.””

Kurti përmendi se vrasja ndodhi më pak se një vit pas demonstratave të 1981-ës, kur organizatat shqiptare po bashkoheshin për Republikën e Kosovës, dhe Serbia i goditi pikërisht ata.

Për Jusuf Gërvallën, Kurti theksoi se ai ishte jo vetëm patriot, por edhe publicist, poet, shkrimtar dhe intelektual, vrasja e të cilit ndërpreu një veprimtari të pasur artistike.

““Jusuf Gërvalla... përveçse patriot, ishte edhe publicist, poet e shkrimtar, krijues, gazetar e intelektual... me vrasjen e Jusufit, kemi humbur edhe një veprimtari artistike e kulturore.””

Sipas Kurtit, progresi dhe siguria e shtetit sot, si dhe faktorizimi i kombit shqiptar, është dëshmi se flijimet e tyre ia kanë vlejtur fort popullit.

““Progresi e siguria që ka shteti ynë sot... është dëshmi që populli ynë ka ecur rrugës së tij dhe se ato flijime e sakrifica, padyshim që ia kanë vlejtur fort.””