Kurti u prit në Gjilan nga familja e Kadri Zekës dhe anëtari i lartë i PDK-së Zenun Pajaziti

Kryeministri në detyrë i Kosovës, Albin Kurti, ka zhvilluar sot një vizitë në Gjilan ku është pritur nga familja e veprimtarit të shquar Kadri Zeka.

Gjatë kësaj vizite, i pranishëm ka qenë edhe anëtari i lartë i Partisë Demokratike të Kosovës (PDK), Zenun Pajaziti, si dhe Izmi Zeka nga familja e Kadri Zekës. Kurti i ka falënderuar të gjithë për mikpritjen e ngrohtë.

Me këtë rast, Kurti ka kujtuar demonstratat e vitit 1981 dhe vrasjen e Kadri Zekës bashkë me vëllezërit Jusuf dhe Bardhosh Gërvalla në Gjermani nga shërbimet sekrete jugosllave. Ai ka theksuar se kjo vrasje nuk duhet të mbetet pa u zbardhur plotësisht.

“Sot, bëmë homazhe në Dubovik të Deçanit, ku u mirëpritëm nga e bija e Jusufit, Donika Gërvalla, Ministre në detyrë e Punëve të Jashtme e Kosovës. Vizituam edhe familjen e Kadri Zekës ku na pritën Izmi Zeka, Zenun Pajaziti dhe familja e gjerë. Përveçse patriotë, ata ishin aktivistë, krijues, gazetarë dhe intelektualë. Me vrasjen e tyre nuk kemi humbur vetëm tre veprimtarë por poetë e shkrimtarë që kontribonin përmes ideve dhe pendës.”

Kurti ka shpërndarë në rrjetet sociale postimin e plotë ku shpjegon kontekstin historik të ngjarjes, duke theksuar se vetëm nëntë muaj pas demonstratave të 1981-s, Jugosllavia i eliminon tre figurat kyçe të lëvizjes shqiptare.

"Vrasja e tyre nuk duhet të mbetet pa u ndriçuar. Zbardhja e së vërtetës edhe sa i përket urdhërdhënësve dhe ekzekutorëve duhet të ndriçohen që të mundësohet drejtësia e ndëshkimi," ka shkruar Kurti.

Ai ka përfunduar me një homazh: "Lavdi Jusufit, Bardhoshit, Kadriut dhe të gjithë dëshmorëve të kombit shqiptar!"

Kjo vizitë vjen në kuadër të përvjetorit të vrasjes së tyre, duke nxjerrë në pah rëndësinë e kujtesës historike dhe bashkëpunimit ndërpartiak në çështje kombëtare.