45 vjet nga vrasja e Jusuf e Bardhosh Gërvallës dhe Kadri Zekës: Homazhet e liderëve në Dubovik

Në 45-vjetorin e vrasjes së Jusuf e Bardhosh Gërvallës dhe Kadri Zekës nga agjentët e UDB-së, kryeministri në detyrë i Republikës së Kosovës Albin Kurti, presidentja Vjosa Osmani dhe kryetari i Kuvendit Dimal Basha kanë bërë homazhe dhe vendosur lule të freskëta te varret e tyre në fshatin Dubovik.

Kurti theksoi se edhe para suprimimit të autonomisë, Kosova kishte patriotë të jashtëzakonshëm si Gërvallët dhe Zeka, të cilët u flijuan për lirinë që gëzojmë sot.

““Edhe para luftës, shqiptarët nën Jugosllavi e Serbi nuk kishin paqe dhe për këtë janë dëshmi edhe demonstratat e shumta të organizuara, por gjithashtu edhe ish-të burgosurit e të persekutuarit politikë.””

Kurti shpjegoi se vrasja e tyre erdhi pas demonstratave të 1981-s, kur organizatat shqiptare po bashkoheshin për Republikën e Kosovës. Ai vlerësoi Jusuf Gërvallën si patriot, publicist, poet, shkrimtar dhe intelektual.

““Prandaj, me vrasjen e Jusufit, nuk kemi humbur vetëm një veprimtar dhe nuk është shtyrë vetëm bashkimi i organizatave shqiptare të asaj kohe, por njëkohësisht kemi humbur edhe një veprimtari artistike e kulturore, e cila nuk u shtrua asnjëherë për shkak se jeta e tij u këput përgjysmë.””

Kryeministri theksoi se progresi dhe siguria e shtetit sot dëshmojnë se flijimet e tyre ia kanë vlejtur fort.

““Sakrifica e tyre trasoi rrugën për shtetin tonë.””

Presidentja Osmani e cilësoi ditën si simbol të krenarisë kombëtare për sakrificën e tyre.