Walker: “S’ka shumë gjëra me të cilat nuk pajtohem me Kurtin”, Kosova ecën mirë në aspektin demokratik

Ish-ambasadori amerikan në Kosovë, William Walker, ka dhënë vlerësimin e tij pozitiv për kryeministrin aktual Albin Kurti në një intervistë të dhënë për T7. Ai ka theksuar se Vetëvendosja kishte mbështetje të madhe popullore edhe më parë, pavarësisht mungesës së komunikimit me Ambasadën Amerikane.

Walker e ka përshkruar Kurtin si një figurë të arsimuar mirë dhe njohës të thellë të Kosovës si dhe botës. Sipas tij, performanca e Kurtit si kryeministër deri më tani ka qenë kryesisht e pranueshme, ndërsa Kosova po përparon në aspektin demokratik.

““Albin Kurti është shumë i arsimuar. Ai e njeh botën. Ai e njeh Kosovën.””

Ai ka komentuar gjithashtu rezultatin e zgjedhjeve, ku Vetëvendosja mori rreth 50% të votave, duke e quajtur këtë shenjë të mbështetjes qytetare të fortë.

““Nuk po them që është i vetmi person. Ka njerëz të tjerë që jam i sigurt që mund të bënin një punë të mirë si Kryeministër, por sa i përket asaj që ai ka bërë deri më tani si Kryeministër, unë nuk kam parë shumë gjëra me të cilat nuk pajtohem. Por unë mendoj se Kosova po ecën shumë mirë në aspektin demokratik, dhe nëse Vetëvendosje mund të marrë 50% të votave në një zgjedhje, siç sapo bëri, atëherë dikush duhet të jetë në favor të tyre, dhe kjo për mua është në rregull.””

Këto komente vijnë në një kohë kur Kosova po kalon në një fazë të re politike pas zgjedhjeve të fundit. /Indeksonline/