Zgjedhja e Presidentit: Thirrje për konsensus që t’i iket krizës institucionale

Analistët politikë në Kosovë po bëjnë thirrje që partitë politike të arrijnë një marrëveshje sa më parë për zgjedhjen e presidentit të ri, ose të propozojnë një kandidat jopolitik. Sipas tyre, ky është hapi i vetëm i domosdoshëm për të parandaluar bllokadat e reja institucionale dhe shkuarjen në zgjedhje të parakohshme.

Baraliu: Interesi shtetëror të jetë prioritet

Mazllum Baraliu, njohës i zhvillimeve politike, thekson se vendi nuk ka nevojë për zgjedhje të reja dhe se partitë duhet të kenë nxjerrë mësime nga krizat e kaluara. Ai bëri thirrje që mirëkuptimi të mbizotërojë mbi interesat e ngushta partiake.

“Nuk duhet të ketë krizë në zgjedhjen e presidentit, por përkundrazi një marrëveshje e cila mund të arrihet shumë shpejt me mirëkuptim. Interesi shtetëror duhet të jetë prioritet, e jo interesi i ngushtë partiak dhe politik.”

Burjani kërkon figurë jopolitike pa konsensus

Në anën tjetër, Blerim Burjani vlerëson se pa një konsensus të qartë ndërmjet pozitës dhe opozitës, as nuk duhet të thirret seanca për votim. Ai sugjeron se zgjidhja mund të jetë një figurë jopolitike, nëse palët nuk merren vesh për një emër tjetër.

“Unë mendoj se pa konsensus ndërpartiak, as opozita dhe as pozita nuk duhet të shkojnë fare në seancë. Nëse s’ka marrëveshje, s’ka asgjë,” deklaroi Burjani, duke shtuar se opozita mund të lëshojë pe vetëm nëse kandidati është jashtë sferave partiake.

Opozita: Duhet figurë unifikuese

Edhe partitë opozitare ndajnë të njëjtin mendim për domosdoshmërinë e një marrëveshjeje. Kreu i LDK-së, Lumir Abdixhiku, ka ritheksuar vazhdimisht se partia e tij nuk do të mbështesë asnjë kandidat pa një konsensus paraprak politik, duke insistuar në një figurë që përfaqëson unitetin e popullit.

Sipas afateve kushtetuese, presidenti i ri i vendit duhet të zgjidhet jo më larg se fillimi i muajit mars, duke e kthyer këtë temë në prioritetin kryesor të javëve në vijim.