PËRDITËSIM: Zjarr në Gracë të Vushtrrisë, vdes një grua e moshuar rreth 80-vjeçare

Një ngjarje tragjike ka ndodhur mbrëmjen e sotme në fshatin Gracë të Vushtrrisë, ku një shtëpi banimi është përfshirë nga flakët, duke i marrë jetën një gruaje të moshuar rreth 80-vjeçare.

Më herët ishte dyshuar për një viktimë të mundshme, ndërsa tani policia ka konfirmuar vdekjen. Lajmin e ka konfirmuar për Telegrafin Avni Zahiti, zëdhënës i Policisë për rajonin e Mitrovicës.

““Si pasojë e përfshirjes së shtëpisë nga zjarri, në vendngjarje ka humbur jetën viktima femër, rreth 80-vjeçare. Ekipet emergjente mjekësore kanë konstatuar vdekjen e saj në vendin e ngjarjes,””

Sipas tij, rreth orës 22:20 Policia ka pranuar njoftimin se një shtëpi ishte përfshirë nga zjarri, ndërsa njësitet policore dhe zjarrfikëse kanë dalë menjëherë në vendin e ngjarjes.

Hetuesit policorë, në koordinim me Prokurorin kompetent, po ndërmarrin të gjitha veprimet hetimore për të sqaruar rrethanat e rastit. Me vendim të Prokurorit të Shtetit, trupi i pajetë i viktimës është dërguar në Institutin e Mjekësisë Ligjore (IML) për obduksion.

Më herët, Komandanti i Zjarrfikësve të Vushtrrisë, Fadil Hyseni, kishte konfirmuar se zjarri ishte raportuar rreth orës 21:00 dhe dyshohej për një grua të moshuar të ngujuar brenda.

“Rreth orës 21:00 e kemi pranuar një informatë se një shtëpi është kallë në fshatin Gracë. Po dyshohet se brenda ka mbetur një grua e moshuar e komunitetit serb. Aksioni po vazhdon ende, zjarri nuk është lokalizuar ende. Akoma nuk kemi diçka konkrete.”