Avokati i Popullit alarmon Trendafilovën: Specialja po gjykon me prova të paligjshme nga Serbia
Avokati i Popullit, Naim Qelaj, i ka dërguar një letër alarmante Ekaterina Trendafilovës, duke kritikuar DHSK-në për përdorimin e provave të autoriteteve serbe pas vitit 1999 dhe për drejtësi selektive ndaj shqiptarëve.
Alarmim për Drejtësinë Selective dhe Provat nga Serbia
Institucioni i Avokatit të Popullit në Kosovë ka ngritur shqetësime serioze lidhur me ligjshmërinë e proceseve gjyqësore që po zhvillohen në Dhomat e Specializuara të Kosovës (DHSK) në Hagë. Në një letër dërguar kryetares së DHSK-së, Ekaterina Trendafilova, Avokati i Popullit Naim Qelaj paralajmëron se po përdoren prova të dyshimta që burojnë nga autoritetet serbe pas vitit 1999.
Sipas letrës së siguruar nga Kanal10, këto dokumente pretendohet se janë prodhuar në një periudhë kur Serbia nuk kishte juridiksion të ligjshëm në Kosovë. Përveç kësaj, Qelaj ka vënë në dukje pranimin e librave dhe botimeve me kredibilitet të ulët si materiale provuese, gjë që sipas tij minon besueshmërinë e procedurave.
Mungesa e Llogaridhënies dhe "Drejtësia Monoetnike"
Një ndër pikat më kritike të letrës është konstatimi se Dhomat e Specializuara nuk i nënshtrohen asnjë mekanizmi vendor të monitorimit apo llogaridhënies. Qelaj thekson se fakti që të gjithë të akuzuarit deri më tani janë të së njëjtës përkatësi etnike (shqiptarë), ka prodhuar përceptimin e një drejtësie selektive dhe monoetnike.
“Gjykata ka refuzuar pothuajse të gjitha kërkesat procedurale dhe provuese të mbrojtjes. Një praktikë e tillë është jashtëzakonisht e pazakontë dhe rrezikon të minojë besueshmërinë e gjykimeve dhe parimin e gjykimit të drejtë.”
Avokati i Popullit ka goditur edhe praktikën e paraburgimit të zgjatur, duke e cilësuar atë si problematike dhe në kundërshtim me standardet e Gjykatës Evropiane për të Drejtat e Njeriut. Ai vë në pyetje vlerësimin e rrezikut të ikjes si "i lartë" në mënyrë uniforme për të gjithë të akuzuarit, duke kujtuar se krerët e UÇK-së u vetëdorëzuan vullnetarisht.
Aktualisht, në Hagë po vazhdon procesi kundër Hashim Thaçit, Kadri Veselit, Jakup Krasniqit dhe Rexhep Selimit. Ata mbahen në paraburgim që nga viti 2020 dhe vazhdojnë të deklarohen të pafajshëm për të gjitha akuzat e ngritura nga Prokuroria e Specializuar.
