Përditësim: ZKM jep detaje për takimin në Bruksel – Dakordim për Komisionin e Pagjeturve dhe premtime për lëvizje të tjera

Zëvendëskryeministri i parë në detyrë për Integrim Evropian, Besnik Bislimi, ka marrë pjesë në takimet e dialogut Kosovë-Serbi në Bruksel. Takimet u kurorëzuan me sukses në funksionalizimin e Komisionit të Përbashkët për Personat e Zhdukur me Dhunë.

““Pjesa më e madhe e kohës sot ka kaluar në takime bilaterale, domethënë fillimisht pala kosovare me Bashkimin Evropian dhe pastaj edhe pala serbe. Qëllimi ishte që të arrijmë dakordim që sot ta funksionalizojmë Komisionin e Përbashkët për jetësimin apo zbatimin e marrëveshjes për personat e pagjetur në mes të Kryeministrit Kurti dhe presidentit Vuçiq. Takimet ishin të suksesshme dhe në fund arritëm që përfundimisht ta jetësojmë këtë objektiv. Tani ka mbetur që në javët e ardhshme të takohen zëvendësat tanë dhe të përcaktojnë prioritetet e para për punën e Komisionit të Përbashkët”.”

Tema kryesore ishte jetësimi i këtij Komisioni, ndërsa në pika të shkurtra u prekën edhe elemente të tjera ku priten lëvizje në të ardhmen, pas formimit të qeverisë së re të Kosovës.

Takimet përfshinë diskutime bilaterale fillimisht me Bashkimin Evropian, pastaj me palën serbe. Marrëveshja bazohet në atë të arritur mes kryeministrit Albin Kurti dhe presidentit serb Aleksandar Vuçiq.

Në javët e ardhshme, zëvendësnegociatorët do të përcaktojnë prioritetet e para të punës së Komisionit, një hap i rëndësishëm drejt mbylljes së plagëve të luftës.