Cakolli: Rinumërimi i pjesshëm nxjerr në pah problemet serioze në procesin zgjedhor

Rinumërimi i pjesshëm i votave në zgjedhjet e fundit parlamentare ka nxjerrë në pah probleme të rënda në procesin e numërimit, sipas Eugjen Cakollit nga Instituti Demokratik i Kosovës (KDI).

Cakolli ka theksuar se dallimet e zbuluara janë substanciale dhe prekin kryesisht qendrat zgjedhore në zonat ku vijnë kandidatët e partive të mëdha.

Sipas të dhënave të deritanishme nga rinumërimi, ndryshimet kumulative në vota arrijnë gati 15 mijë. Ndër partitë kryesore, PDK-ja ka dallime prej rreth 7,719 votash, LVV-ja 2,947, LDK-ja 1,676 dhe AAK-ja 639 vota.

“Pas rinumërimit dhe korrigjimeve në QNR, rreth 9,500 vota janë hequr dhe rreth 3,500 janë shtuar për kandidatët.”

Mbi 400 kandidatë nga katër partitë kryesore kanë pësuar ndryshime në numrin e votave të tyre, me disa që kanë fituar dhe të tjerë që kanë humbur vota.

Cakolli ka bërë thirrje për rinumërim të plotë të votave, duke argumentuar se kjo është e domosdoshme për të mbajtur besueshmërinë e procesit zgjedhor dhe për të shmangur komplikime me afatet kushtetuese.

“Për të ruajtur besueshmërinë e procesit zgjedhor dhe për të shmangur ndikimin në afatet kushtetuese, është i nevojshëm rinumërimi i plotë i votave.”