Cakolli: Zgjedhjet mund të mbahen në prill 2026, gjasat janë reale

Eugen Cakolli nga Instituti Kosovar për Demokraci, në emisionin "Click" në RTV21, nuk e përjashtoi mundësinë e zgjedhjeve të parakohshme në prill të vitit 2026. Sipas analizuesit politik, mosgatishmëria e liderit të Lidhjes Vetëvendosje, Albin Kurti, që të ketë ndonjë koalicion me parti të tjera për postin e presidentit, bën që gjasat për zgjedhje janë më reale se kurrë.

Koha për zgjedhjet

"Megjithëse besoj që mund të gjendet ndonjë zgjidhje deri në atë kohë, por nëse do të kemi zgjedhje, ato do të mbahen në javën e dytë të muajit prill, respektivisht diku nga data 1 deri më 20 prill", tha Cakolli gjatë emisionit.

Sipas analizuesit, presidenti duhet të votohet më së largu deri më mars, përndryshe vendi do të shkojë automatikisht drejt zgjedhjeve të parakohshme. Kjo kohë është e lidhur me procedurat konstitucinale që rregullojnë procesin e zgjedhjes presidenciale.

Presioni më i madh mbi LDK-në

Cakolli shtoi se presioni më i madh për votat në favor të kandidates për presidente, Vjosa Osmani, do të bjerë mbi Lidhjen Demokratike të Kosovës. "Meqenëse Vetëvendosja pritet t'i ketë 57 deputetë, numër të cilit nëse i shtohen edhe 11 deputetët nga komunitetet jo-shumicë dhe një nga komuniteti jo-serb, atëherë e çon numrin në 68 deputetë," shpjegoi ai.

Partitë zakonisht janë kujdesur që mos ta lënë për një deputet, e kjo nënkupton se barra më e madhe e presionit do të bjerë mbi LDK-në "për faktin se po tentohet që të gjendet një fajtor kujdestar në rast të dështimit të zgjedhjes së presidentit", sipas Cakollit.

Kurti nuk rrezikon shumë

Cakolli vuri në dukje se Albin Kurti nuk rrezikon shumë nëse dështon zgjedhja e presidentit, pasi që ai gjegjësisht Vetëvendosja ka tre mandate. Kjo nënkupton se edhe në rastin e zgjedhjeve të parakohshme, ata do të kishin mundësi të qenin pjese e qeverisjes.