Driton Selmanaj: Mbi 800 vota më pak pas rinumërimit, zgjedhjet e 28 dhjetorit manipulim industrial

Kryetari i degës së LDK-së në Prizren, Driton Selmanaj, ka reaguar me forcë pas rezultateve të rinumërimit të votave në komunën e Prizrenit. Lista e kandidatëve të LDK-së, përfshirë atë të Selmanajt, ka humbur mbi 800 vota, çka ka nxjerrë në pah parregullësi serioze në proces.

Selmanaj ka postuar në Facebook një reagim të ashpër, duke e cilësuar procesin e zgjedhjeve të 28 dhjetorit si 'manipulim industrial'. Ai ka theksuar se rinumërimi në të gjithë Kosovën është i domosdoshëm për të rikthyer besimin në sistemin zgjedhor.

““Fatkeqësisht këtij skenari nuk i ka shpëtuar as lista e kandidatëve të LDK-së, përfshirë dhe mua si kandidatë për deputet. Unë si kandidat për deputet dhe si kryetar i Degës së LDK-së në Prizren distancohem tërësisht nga kushdo që ka marrë guximin të tjetërsojë vullnetin e qytetarëve të komunës sonë”.”

Kjo vjen në vazhdën e dyshimeve të shumta për manipulime në Qendrat Komunale të Numërimit (QKN), ku janë raportuar devijime të mëdha veçanërisht në Prizren. KQZ ka rinumëruar qindra vendvotime, duke nxjerrë mijëra vota të humbura ose shtesa për kandidatë të caktuar.

Selmanaj ka kërkuar distancim të plotë nga çdo akt i tillë dhe ka theksuar se vullneti i qytetarëve nuk duhet të tjetërsohet.