Gërvalla flet për procesin ndaj ish-krerëve të UÇK-së në Hagë: Nuk jap gjykime pa parë dokumentacionin

Ministrja e Punëve të Jashtme dhe Diasporës, Donika Gërvalla, është deklaruar së fundmi lidhur me procesin gjyqësor që po zhvillohet në Hagë kundër ish-krerëve të Ushtrisë Çlirimtare të Kosovës (UÇK). Gërvalla ka theksuar se nuk mund të japë propozime apo gjykime konkrete rreth këtij procesi pa pasur qasje në dokumentacionin e plotë dhe të verifikuar.

Gjatë prononcimit të saj, Gërvalla u shpreh se në disa raste është pyetur për çështje që nuk kanë qenë më në dorën e saj, duke rikujtuar se vendimet për të dërguar proceset drejt Hagës janë marrë në legjislatura dhe periudha të mëparshme qeverisëse.

Gërvalla nënvizoi se gjatë kohës sa shërben si ministre, ajo është kujdesur që institucionet e Kosovës, përfshirë misionin në Hagë, të angazhohen maksimalisht. Sipas saj, ky angazhim ka pasur për qëllim sigurimin e mbështetjes së duhur si për të akuzuarit, ashtu edhe për familjarët e tyre, gjithmonë duke u bazuar në kapacitetet dhe mandatin që kanë këto institucione.

“Nuk mund të jap propozime e gjykime konkrete pa parë dokumentacionin,” ka thënë ajo, duke shtuar se do të ishte jonkorrekte të fliste për detaje të proceseve që supozohet të kenë ndodhur në periudha të mëparshme, për të cilat ajo nuk disponon informacion të plotë.