KGJK miraton Planin Strategjik për Efikasitetin e Trajtimit të Rasteve të Korrupsionit, Keqpërdorimit të Detyrës Zyrtare dhe Krimit të Organizuar 2025-2027

Këshilli Gjyqësor i Kosovës (KGJK) në mbledhjen e së enjtes miratoi Planin Strategjik për Efikasitetin e Trajtimit të Rasteve të Korrupsionit, Keqpërdorimit të Detyrës Zyrtare dhe Krimit të Organizuar për periudhën 2025-2027. Ky hap synon të forcojë efikasitetin në gjykata për rastet më të rëndësishme.

Afrim Shala, kryetar i Komisionit për Monitorimin, Vlerësimin dhe Raportimin e Planit Strategjik për Përmirësimin e Qasjes në Drejtësi 2022-2025, theksoi se efikasiteti në trajtimin e rasteve të korrupsionit është mbi 100% në nivel të gjykatave themelore. Ai vlerësoi efikasitetin e lartë të gjykatave në rastet prioritare.

“Gjykatat kanë treguar një efikasitet të theksuar të trajtimit të rasteve që janë me prioritet sipas planit strategjik, si tek rastet e korrupsionit, ashtu edhe tek rastet tjera.”

Shala njoftoi gjithashtu për ulje të numrit të lëndëve të vjetra në të gjitha departamentet, përveç Departamentit Special. Krahasuar me fundin e vitit 2024, numri i lëndëve të vjetra u zvogëlua për 1.799 lëndë. Në total, numri i lëndëve në gjykata ra nga 39.826 në fund të 2024 në 908 lëndë më pak në fund të vitit të kaluar.

“Në shikim të parë duket që është një numër i vogël, megjithatë e rëndësishme është që nuk ka pasur rritje por është zvogëluar, pavarësisht faktit që edhe gjatë vitit të kaluar gjykatat janë përballur me numër të madh të lëndëve.”

Plani i ri ndan rastet prioritare në tre kategori: lëndë të vjetra (më shumë se 24 muaj), lëndë të kthyera në rigjykim dhe lëndë me prioritet ligjor. Për lëndët e vjetra, trajtimi sipas vjetërsisë së arritjes në gjykatë, me prioritet absolut për rastet e kthyera në rigjykim.

Rastet me prioritet ligjor kategorizohen në gjashtë grupe: prioritare civile, penale, Dhomës së Posaçme të Gjykatës Supreme, Gjykatës Komerciale, Departamentit Administrativ dhe kundërvajtje.

Ky plan pritet të ndihmojë në zvogëlimin e akumulimit të lëndëve dhe të rrisë besimin në sistemin gjyqësor të Kosovës, duke u fokusuar në luftën kundër korrupsionit dhe krimit të organizuar.