Kuvendi i Shtimes nderon ambasadorin William Walker me titullin “Qytetar i Përjetshëm i Shtimes”

Në ceremoninë përkujtimore të përvjetorit të Masakrës së Reçakut, Kuvendi i Komunës së Shtimes ka miratuar një vendim historik duke i dhënë ish-ambasadorit të SHBA-së, William Walker, titullin nderues “Qytetar i Përjetshëm i Shtimes”.

Ky nderim vjen si shprehje mirënjohjeje për rolin kyç të Walker-it në zbardhjen e së vërtetës mbi ngjarjet e 15 janarit 1999 në Reçak, ku forcat serbe kryen një masakër mizore ndaj civilëve shqiptarë. Walker, si shef i Misionit Verifikues të OSBE-së, ishte dëshmitar okular dhe ngriti zërin për krimet e luftës, duke kontribuar në ndërhyrjen ndërkombëtare që çoi në çlirimin e Kosovës.

Titulli jepet vetëm për personalitete me ndikim të madh historik dhe moral ndaj komunitetit të Shtimes. Sipas njoftimit zyrtar, ky është një akt mirënjohjeje institucionale dhe shenjë respekti të përhershëm ndaj angazhimit të tij.

““Ambasadori Walker është pjesë e historisë sonë dhe e së vërtetës sonë. Sot, Komuna e Shtimes ia hap përjetësisht dyert dhe zemrën si qytetar i këtyre njerëzve, si dëshmitar i së vërtetës dhe si mik i pandarë i Reçakut””

Rrahman Jakupi, kryesuesi i Kuvendit, theksoi se ky titull simbolizon lidhjen e vazhdueshme të Walker-it me Shtimen dhe banorët e saj. Ai vlerësoi rolin e tij në informimin e opinionit ndërkombëtar për krimet e kryera në Reçak.

Ngjarja shënon një moment të rëndësishëm në përkujtimin e viktimave të luftës dhe forcimin e miqësisë Kosovë-SHBA. /Bazuar në Telegrafi/