Njësitë B2 dhe A3 të KEK-ut pritet të rikthehen në operim gjatë mbrëmjes

Dy njësitë e Korporatës Energjetike të Kosovës (KEK), B2 dhe A3, pritet të kthehen në funksion gjatë mbrëmjes së sotme, ka njoftuar ministrja në detyrë e Ekonomisë, Artane Rizvanolli.

Rizvanolli e ka bërë të ditur këtë lajm pas një takimi me menaxhmentin e KEK-ut. Aktualisht, në operim janë tri njësi: B1, A4 dhe A5. Ekipet teknike po punojnë me tri ndërrime, 24 orë në ditë, për të rikthyer sa më shpejt njësitë e mbetura.

“Nga KEK-u presim që gjatë kësaj periudhe të ftohtë kur kërkesa është e lartë, të punojë me 5 blloqe. Ndonëse kjo është sfiduese, TC Kosova A ka operuar me të tri njësitë njëkohësisht për 22 ditë... Për krahasim, për 25 vitet e kaluara KEK ka punuar me 5 njësi vetëm 55 ditë në total.”

Ajo ka theksuar rëndësinë e angazhimit maksimal nga menaxhmenti dhe punëtorët e KEK-ut për të mbajtur të gjitha njësitë në funksion gjatë muajve të ftohtë. Gjithashtu, të hënën, ministrja ka publikuar një video ku shihen punëtorët duke punuar dhe ka bërë thirrje për kursim të energjisë elektrike.

Stabiliteti i furnizimit me energji është thelbësor në kushtet e konsumit të lartë dimëror, ndërsa KEK-u po mundohet të maksimizojë prodhimin vendor.