A synon Përparim Rama kreun e LDK-së? Deklarohet kryetari i Prishtinës
Kryetari i Prishtinës, Përparim Rama, flet për mundësinë e marrjes së udhëheqjes së LDK-së në rast se Lumir Abdixhiku kalon në postin e Presidentit. Rama thekson se fokusi i tij mbetet te qytetarët e kryeqytetit.
Rama: Fokusi im është Prishtina, por jam këtu për të ndihmuar LDK-në
Kryetari i Prishtinës, Përparim Rama, ka sqaruar pozicionin e tij lidhur me mundësinë e marrjes së drejtimit të Lidhjes Demokratike të Kosovës (LDK), në rast se kryetari aktual, Lumir Abdixhiku, do të zgjidhej President i Kosovës. Lidhur me këtë skenar, Rama është treguar i prerë se vëmendja e tij mbetet te kryeqyteti.
Gjatë një prononcimi për media, Rama u pyet drejtpërdrejt: “A mendoni ta merrni postin e kryetarit të LDK-së nëse Lumir Abdixhiku bëhet president i Kosovës?”. Përgjigja e tij theksoi përkushtimin ndaj mandatit aktual në Prishtinë dhe besimin te strukturat e brendshme të partisë.
“E kam cek edhe më përpara që unë jam kryetar i kryeqytetit. Kam një mandat katërvjeçar. Kemi njerëz të mrekullueshëm përbrenda partisë, të cilët munden me i çu proceset përpara. S’ma merr mendja që kanë nevojë për mua, por po them unë jam këtu për kryeqytetin dhe për qytetarët e kryeqytetit.”
Rama shtoi se duke i shërbyer Prishtinës, ai i shërben të gjithë Kosovës, por la të hapur mundësinë për të ndihmuar subjektin e tij politik në çfarëdo forme tjetër që do të jetë e nevojshme. “Do të jem aty në ndihmë për çfarëdo ndihme që do të kenë nevojë, por fokusi im është kryeqyteti,” përfundoi ai.
