PËRDITËSIM: Rama mohon raportimet e Bloomberg – Gënjeshtër për 1 miliard dollarë ose pranim palestinezësh në Shqipëri

Kryeministri i Shqipërisë, Edi Rama, ka reaguar pas artikullit të Bloomberg, duke i mohuar si të pavërteta pretendimet se Shqipëria do të paguajë 1 miliard dollarë për të qenë pjesë e Bordit të Paqes të presidentit Donald Trump, apo se do të presë palestinezë në vend.

Mesazhi i Ramës erdhi përmes një postimi në rrjetin social X, ku ai i quajti këto raporte “gënjeshtra” dhe kritikoi median dhe opozitën lokale si “tenxheret politike e mediatike të mexhelisit tonë [që] janë teneqera të zhurmshme të Shqipërisë së vjetër”.

““Tenxheret politike e mediatike të mexhelisit tonë janë teneqera të zhurmshme të Shqipërisë së vjetër. Ajo që po ndërtohet sot është një Shqipëri tjetër, e dinjitetshme ndërkombëtarisht dhe e respektuar botërisht.””

Rama renditi pretendimet e pavërteta: se në Bordin e Paqes janë ftuar të gjitha shtetet e OKB-së, se Shqipëria paguan 1 miliard euro dhe se palestinezët do të vendosen këtu. Ai theksoi se e vërteta është më e thjeshtë dhe se besimi i shqiptarëve dhe respekti ndërkombëtar janë prioriteti i tij.

““Ky është një moment i jashtëzakonshëm i Shqipërisë, ku tërbimi i tenxhereve thjesht na siguron se sa më shumë lehin qentë, aq më përpara është duke shkuar karvani.””

Konteksti i ftesës zyrtare

Kujtojmë se më herët Rama kishte publikuar një letër zyrtare nga Trump, ku Shqipëria ftohej si anëtare themeluese e Bordit të Paqes për mbikëqyrjen e Gazës. Ftesa ishte pjesë e një nisme më të gjerë me vende si Kanadaja dhe Turqia.

Bordi synon të mbikëqyrë një qeverisje tranzitore në Gaza pas armëpushimit mes Izraelit dhe Hamasit. Kritikët e kanë quajtur planin kontrovers.

Burimi: Telegrafi.com