Shqipëria pjesë e Bordit të Paqes për Gazën me ftesë direkte nga Trump

Kryeministri i Shqipërisë, Edi Rama, ka njoftuar sot se vendi ynë është ftuar nga vetë presidenti amerikan Donald Trump për të qenë anëtar themelues i Bordit të Paqes për Gazën, një iniciativë e re ndërkombëtare për promovimin e paqes në Lindjen e Mesme.

Në një postim në rrjetet sociale më 17 janar, Rama u shpreh i nderuar nga ftesa personale dhe e cilësoi atë si një tjetër majë të paimagjinueshme për Shqipërinë në arenën globale, duke theksuar forcimin e partneritetit strategjik me SHBA-në.

“Shumë i nderuar nga ftesa personale e presidentit Trump, për ta përfaqësuar Shqipërinë në bordin e paqes, një organizatë e re ndërkombëtare e ideuar prej tij, ku Shqipëria ftohet si anëtar themelues... Nuk mund të jem dot më krenar për Shqipërinë, për gjithçka kemi bërë në këto vite duke e kthyer në një Shqipëri tjetër, të dinjitetshme e të respektuar botërisht.”

Bordi i Paqes për Gazën synon të promovojë dialogun dhe zgjidhjet paqësore në konfliktin izraelito-palestinez, duke përfshirë liderë politikë, diplomatë dhe figura të shoqërisë civile nga e gjithë bota.

Përfshirja e Shqipërisë nënkupton një njohje të rolit të saj diplomatik dhe një mundësi për të kontribuar në çështje globale të rëndësisë së madhe.