Indiferencë në Madrid: Shtatë lojtarë nuk reaguan fare për largimin e Xabi Alonsos

Reagimet e yjeve pas shkarkimit të befasishëm

Largimi i Xabi Alonsos nga pankina e Real Madridit ka lënë një shije të hidhur dhe ka krijuar një ndarje të dukshme në dhomat e veshjes. Lajmi, i cili u bë publik të hënën pasdite përmes një komunikate zyrtare, i zuri lojtarët në befasi, duke mos u lënë hapësirë për një lamtumirë ballë për ballë me trajnerin.

Kylian Mbappe ishte i pari që hapi "serinë" e reagimeve në rrjetet sociale, duke i dëshiruar më të mirat trajnerit spanjoll. Pas tij, një varg lojtarësh si Rodrygo, Arda Guler, Federico Valverde dhe Antonio Rudiger publikuan mesazhe respekti dhe falënderimi për punën e bërë.

Shtatë lojtarë zgjedhin heshtjen

Megjithatë, ajo që ka rënë më së shumti në sy është heshtja totale e shtatë lojtarëve të skuadrës së parë. Deri në orët e para të mëngjesit të sotëm, asnjë shenjë reagimi apo mesazh i thjeshtë lamtumire nuk është parë nga ky grup lojtarësh në platformat e tyre sociale.

Ky "injorim" publik vjen në një kohë kur raportet për krisje mes trajnerit dhe një pjese të skuadrës kishin marrë dhenë. Ndërsa kapiteni Dani Carvajal u mjaftua me një "Faleminderit për gjithçka, shef", dhe David Alaba shprehu mesazhe më emocionale, pjesa tjetër e dhomës së veshjes duket se e ka përcjellë Alonson me indiferencë totale.

Kjo heshtje konfirmon prapaskenat e publikuara më herët, ku flitej për një mungesë harmonie që çoi në ndërprerjen e bashkëpunimit mes Alonsos dhe klubit mbretëror.