Sulm me armë zjarri ndaj biznesit të shqiptarit në Greqi, plagosen babë e bir

Një ngjarje e rëndë ka tronditur zonën e Agios Dimitrios në Greqi në orët e para të mëngjesit të së hënës, ku një biznes në pronësi të një shqiptari u bë shënjestër e një sulmi me armë zjarri. Si pasojë e të shtënave, kanë mbetur të plagosur pronari 70-vjeçar dhe djali i tij 39-vjeçar.

Sipas raportimeve nga mediat greke, ngjarja ka ndodhur rreth orës 02:40 në rrugën "Agoniston Polytechneiou". Tre persona ende të paidentifikuar, të cilët udhëtonin me një automjet, janë afruar pranë restorantit "suvlaki" dhe kanë hapur zjarr në drejtim të tij.

Si pasojë e breshërisë, 70-vjeçari me origjinë nga Shqipëria është plagosur në këmbë, ndërsa djali i tij mori plagë në kofshë dhe pulpë. Të dy janë dërguar me urgjencë në spital për të marrë ndihmën mjekësore dhe, sipas informacioneve të fundit, ndodhen jashtë rrezikut për jetën.

Në vendin e ngjarjes, hetuesit kanë gjetur katër gëzhoja plumbash. Autorët janë larguar menjëherë nga vendi i krimit me shpejtësi dhe drejtimi i tyre mbetet i paditur për momentin. Policia greke, përfshirë njësitë speciale për krimet e rënda, ka nisur punën për identifikimin e sulmuesve dhe zbardhjen e plotë të motiveve të këtij sulmi.