Sulm me armë zjarri ndaj biznesit të një shqiptari në Greqi, plagosen babë e bir

Një ngjarje e rëndë ka tronditur zonën Agios Dimitrios në Greqi në orët e para të mëngjesit të së hënës, ku si pasojë e një sulmi me armë zjarri kanë mbetur të plagosur dy shtetas shqiptarë.

Sipas informacioneve nga mediat greke, viktimat e këtij sulmi janë pronari i një restoranti "suvlaki", një 70-vjeçar me origjinë nga Shqipëria, dhe djali i tij 39-vjeçar. Ngjarja ka ndodhur rreth orës 02:40 në rrugën "Agoniston Polytechneiou".

Dëshmitarët dhe raportimet e policisë bëjnë me dije se tre persona janë afruar me një automjet pranë biznesit dhe kanë hapur zjarr në drejtim të tyre. Si pasojë, 70-vjeçari ka marrë plagë në krah, ndërsa djali i tij është qëlluar në kofshë dhe pulpë.

Të dy të plagosurit janë dërguar me urgjencë në spital për trajtim mjekësor. Fatmirësisht, raportohet se ata ndodhen jashtë rrezikut për jetën.

Hetimet nga njësitë speciale të policisë greke

Në vendin e ngjarjes, hetuesit kanë gjetur katër gëzhoja të cilat janë sekuestruar në cilësinë e provës materiale. Autorët e sulmit janë larguar menjëherë nga vendngjarja me një makinë dhe drejtimi i tyre mbetet ende i panjohur.

Rasti po trajtohet me prioritet nga njësitë speciale të krimeve të rënda të policisë greke, të cilët po punojnë për zbardhjen e plotë të motiveve të këtij sulmi dhe identifikimin e autorëve.