Të shtëna në Deçan: Plagosen tre persona, arrestohet i dyshuari
Një pasmesnatë e dhunshme ka ndodhur në Deçan ku një person ka plagosur me armë zjarri një shqiptar dhe dy serbë në një lokal. Policia ka arrestuar autorin dhe ka konfiskuar armën.
Incidenti në një lokal të Deçanit: Tre të plagosur, Policia arreston autorin
Një pasmesnatë e përgjakshme është shënuar në qytetin e Deçanit, ku pas një person pas një mosmarrëveshje ka shtënë me armë zjarri në një lokal, duke lënë të plagosur tre persona. Sipas raportimeve të para, viktimat i përkasin komuniteteve të ndryshme, një shqiptar dhe dy serbë.
Incidenti ka ndodhur rreth orës 00:18 në një lokal në qendër të qytetit. Lajmi është konfirmuar për mediat nga zëdhënësi i Policisë së Kosovës për rajonin e Pejës, Fadil Gashi, i cili saktësoi se njësitet policore kanë reaguar menjëherë pas marrjes së informatës.
“Në orët e para të mëngjesit rreth orës 00:18, policia e Deçanit është njoftuar për të shtëna me armë zjarri në një lokal. Lidhur me këtë njësitet kanë dalë menjëherë në vend të ngjarjes dhe kanë vrejtur tre persona të plagosur, një i komunitetit shqiptar e dy serbë.”
Të plagosurit fillimisht janë dërguar për ndihmë të parë në Qendrën e Mjekësisë Familjare në Deçan, e më pas për shkak të natyrës së lëndimeve janë transportuar me urgjencë drejt Spitalit të Përgjithshëm në Pejë. Për momentin, gjendja e tyre shëndetësore nuk është bërë e ditur plotësisht, por ekipet mjekësore janë duke u kujdesur për trajtimin e tyre.
Policia ka bërë të ditur se autori i dyshuar i këtij sulmi është arrestuar brenda një kohe të shkurtër. Me urdhër të prokurorit të shtetit, atij i është caktuar masa e ndalimit prej 48 orësh. Gjatë operacionit në vendin e ngjarjes, hetuesit kanë sekuestruar një armë zjarri dhe një karikator me 9 fishekë, të cilat do të shërbejnë si prova në procesin e ardhshëm gjyqësor.
Motivet e këtij incidenti mbeten ende të paqarta, ndërsa njësitet kompetente janë në vendin e ngjarjes për të zbardhur rrethanat e plota që çuan deri te plagosja e trefishtë.
