Zelensky falënderon Shqipërinë për mbështetjen e vazhdueshme ndaj Ukrainës dhe dekoron ministrjen Spiropali

Presidenti i Ukrainës, Volodymyr Zelensky, ka shprehur mirënjohje të thellë ndaj Shqipërisë për mbështetjen e saj të vazhdueshme që nga ditët e para të agresionit rus kundër Ukrainës.

Kjo falënderim u bë gjatë vizitës zyrtare të ministres shqiptare për Evropën dhe Punët e Jashtme, Elisa Spiropali, në Kiev, ku ajo u takua me homologun ukrainas Andrii Sybiha dhe më pas me vetë presidentin Zelensky.

Zelensky e cilësoi vizitën e Spiropalit si një sinjal të fortë mbështetjeje në një moment të vështirë për Ukrainën, duke theksuar se ajo vjen në një kohë sfiduese për vendin dhe popullin e tij.

“Faleminderit për mbështetjen ndaj Ukrainës! Jemi shumë mirënjohës ndaj Shqipërisë për mbështetjen e saj që nga fillimi i kësaj lufte.”

Gjatë takimit, palët diskutuan për bashkëpunimin ushtarak, duke përfshirë prodhimin e mbrojtjes, integrimin e të dy vendeve në Bashkimin Evropian – një synim i përbashkët – si dhe zhvillimin e iniciativës PURL (Lista e Kërkesave Parësore për Ukrainën), me mundësinë e pjesëmarrjes së Shqipërisë këtë vit.

Zelensky informoi ministrjen Spiropali për përpjekjet diplomatike me partnerët për arritjen e paqes dhe forcimin e sanksioneve kundër Rusisë, duke nënvizuar rolin e tyre në dobësimin e aftësive luftarake të Moskës.

Kulmi i vizitës ishte dekorimi i Spiropalit me Urdhrin e Princeshës Olga të Klasit të Parë, një nga nderimet më të larta shtetërore në Ukrainë, si shenjë e vlerësimit për rolin e saj në forcimin e marrëdhënieve dypalëshe.

Kjo vizitë forcon lidhjet mes Shqipërisë dhe Ukrainës, duke theksuar angazhimin e Tiranës për sovranitetin ukrainas dhe paqen në Evropë.