Ambasada e SHBA-së përkujton masakrën e Reçakut: "Akt tmerri i papërshkrueshëm që tronditi botën"

Në kuadër të 27-vjetorit të masakrës së Reçakut, Ambasada e Shteteve të Bashkuara të Amerikës në Kosovë ka marrë pjesë në ceremoninë përkujtimore të zhvilluar sot në fshatin Reçak të Shtimes.

Zëvendës-shefi i përkohshëm i misionit, Josh Peterson, u bashkua me udhëheqësit vendorë, institucionet dhe qytetarët e Kosovës për të nderuar 45 viktimat e kësaj masakre barbare të forcave serbe më 15 janar 1999.

“Sot, zëvendës-shefi i përkohshëm, Josh Peterson, iu bashkua udhëheqësve, institucioneve dhe popullit të Kosovës në përkujtimin e viktimave të masakrës së Reçakut — një akt tmerri i papërshkrueshëm që tronditi botën. Kujtesa e tyre le të shërbejë si një kujtesë për detyrën tonë të përbashkët për të mbrojtur të vërtetën dhe dinjitetin dhe si një thirrje për të mos harruar kurrë atë që bota pa. Mos harroni kurrë!”

Masakra e Reçakut konsiderohet si një nga ngjarjet kyçe që çoi në ndërhyrjen ndërkombëtare dhe çlirimin e Kosovës nga regjimi i Millosheviçit. Sot, në mes të homazheve nga liderë vendorë dhe ndërkombëtarë, Ambasada Amerikane thekson rëndësinë e kujtesës historike dhe drejtësisë.

Kjo ngjarje historike vazhdon të mbajë vëmendjen e opinionit publik dhe ndërkombëtar, duke shërbyer si simbol i rezistencës dhe padrejtësive të luftës.