Mitsotakis reagon për deklaratën e Ramës

Kryeministri i Greqisë, Kyriakos Mitsotakis, ka reaguar sot në lidhje me debatin e krijuar pas deklaratës së kryeministrit shqiptar Edi Rama rreth origjinës së grekëve.

Në një intervistë për një televizion grek mëngjesin e së shtunës, Mitsotakis u pyet për batutat e Ramës me gazetarin amerikano-grek John Defterios në Abu Dhabi.

“E njoh atë prej shumë vitesh dhe është një politikan me një mënyrë të veçantë shprehjeje, shpesh thotë gjëra që nuk duhet t’i thotë. Këtë herë bëri një gabim, të cilin megjithatë e kuptoi dhe e korrigjoi.”

Rama kishte lënë të kuptohej se grekët nuk janë trashëgimtarë të drejtpërdrejtë të filozofëve si Aristoteli dhe Platoni, duke shkaktuar reagime të shumta në mediat greke.

Media greke si Skai.gr e kanë cilësuar Ramën si provokues për këto komente.

Ky debat vjen në një kohë kur marrëdhëniet midis Shqipërisë dhe Greqisë janë të ndjeshme për çështje si minoritetet dhe kufijtë.