Alarmi në Libofshë: Lumi Seman çan argjinaturën, qindra hektarë dhe 20 banesa nën ujë

Situatë e rëndë në Libofshë: Uji pushton shtëpitë dhe tokën bujqësore

Çarja e argjinaturës së lumit Seman në disa segmente ka shkaktuar një situatë kritike në fshatin Hasturkas të njësisë administrative Libofshë. Prurjet e mëdha dhe dëmtimi i mbrojtëseve lumore kanë bërë që qindra hektarë tokë bujqësore dhe rreth 20 banesa të gjenden nën pushtetin e ujit.

Gjatë natës, gjendja është përkeqësuar ndjeshëm ndërsa niveli i ujit ka vijuar të rritet. Banorët e zonës kanë qëndruar në gatishmëri të plotë mes ankthit dhe pasigurisë. Raportohet se deri më tani janë evakuuar 9 persona të cilët janë strehuar te të afërmit e tyre. Megjithatë, frika mbetet e madhe pasi disa familje kanë humbur kontaktet me të afërmit e tyre për shkak të izolimit total të zonës nga uji.

Ndërhyrja e ushtrisë dhe evakuimet me varka

Në zonën e prekur kanë mbërritur forcat e ushtrisë, të cilat po operojnë me varka për të shpëtuar personat e bllokuar. Operacionet janë përqendruar veçanërisht në zonat pranë stallave të bagëtive, ku po punohet për evakuimin e çobanëve dhe krerëve të bagëtive që rrezikohen të mbyten. Operacioni po zhvillohet në kushte tejet të vështira, pasi prurjet e lumit Seman mbeten ende në nivele alarmante.

“Përmbytja erdhi papritur. Nuk patëm kohë të shpëtonim as orenditë e asgjë. Argjinatura ka qenë e dëmtuar prej vitesh dhe askush nuk vuri dorë.”

Banorët e Hasturkasit shprehen të revoltuar me institucionet përgjegjëse. Sipas tyre, ky ishte një katastrofë e paralajmëruar. Ata theksojnë se argjinatura e Semanit ka qenë e amortizuar prej vitesh dhe se mungesa e investimeve parandaluese ka çuar në këtë situatë që mund të shmangej.

Autoritetet lokale ndodhen në terren për të vlerësimin fillestar të dëmeve, ndërkohë që bilanci i pasojave në bujqësi dhe ekonomi pritet të jetë i rëndë.